काठमाडौँ, लुम्बिनी लायन्सले दोस्रो संस्करणको नेपाल प्रिमियर लिग (एनपिएल) क्रिकेटमा तेस्रो जीत दर्ता गर्दै प्लेअफको सम्भावना बलियो बनाएको छ। कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट रङ्गशालामा भएको खेलमा लुम्बिनीले विराटनगर किङ्ग्सलाई ५ विकेटले पराजित गर्यो।
१४५ रनको लक्ष्य पछ्याएको लुम्बिनीले ५ विकेट गुमाउँदै लक्ष्य पूरा गर्यो। लुम्बिनीका ओपनर डार्सी सर्ट उत्कृष्ट फर्ममा रहेर सर्वाधिक ५७ रनको योगदान दिए।
बलिङतर्फ विराटनगरका कप्तान सन्दीप लामिछाने र सुभास भण्डारीले २–२ विकेट तथा बसिर अहमदले १ विकेट लिए।
यसअघि टस हारेर पहिला ब्याटिङ गरेको विराटनगरले निर्धारित २० ओभरमा ८ विकेट गुमाउँदै १४४ रन जोडेको थियो। विराटनगरका लोकेश बमले ३५, बसिर अहमदले २८ र साम हिजलेटले २७ रन बनाए। लुम्बिनीका शेर मल्लले उत्कृष्ट बलिङ गर्दै ३ विकेट झारे।
यो जीतसँगै लुम्बिनीले ६ अंक जोड्दै प्लेअफ प्रतिस्पर्धामा आफूलाई बलियो बनाएको छ। उता, आठ अंक सहित विराटनगर पनि प्लेअफ दौडमै कायम छ।
