कुलमान घिसिङ र खगेन्द्र सुनारको दल एउटै चुनाव चिह्नमा, ‘बिजुलीको चिम’मा सहमति

काठमाडौं । उज्यालो नेपाल पार्टी र हाम्रो पार्टी नेपालले आगामी प्रतिनिधिसभा निर्वाचनमा एउटै चुनाव चिह्न प्रयोग गर्ने भएका छन्। बुधबार काठमाडौंमा सम्पन्न छलफलपछि दुवै दलले ‘बिजुलीको चिम’लाई साझा चुनाव चिह्नका रूपमा प्रयोग गर्ने सहमति जुटाएको उज्यालो नेपालका प्रवक्ता राजु थापाले जानकारी दिए।

उज्यालो नेपाल पार्टीको संरक्षकत्व ऊर्जामन्त्री कुलमान घिसिङकाे रहेको छ भने हाम्रो पार्टी नेपाल अभियन्ता खगेन्द्र सुनारले गठन गरेका हुन्। दुवै दलले संयुक्त रूपमा प्रतिस्पर्धा गर्दै चुनावी प्रभाव बढाउने उद्देश्यसहित सहकार्य गरेको बताएका छन्।

आगामी फागुन २१ गते हुने प्रतिनिधिसभा निर्वाचनलाई लक्षित गरिएको यो सहकार्यबारे निर्वाचन आयोगमा निवेदन दर्ता गर्न दुवै दलले तयारी गरेको प्रवक्ता थापाले बताए।

उनका अनुसार, सहमतिपत्रसहित आयोगमा पेश हुने निवेदनपछि दुवै दल ‘बिजुलीको चिम’ चिह्न प्रयोग गरेर निर्वाचनमा उत्रनेछन्।