विराटनगरको लगातार चौथो जितको दाउ, चितवन अपराजित यात्रा रोक्ने तयारीमा

काठमाडौँ । नेपाल प्रिमियर लिग (एनपिएल) अन्तर्गत आज कीर्तिपुरस्थित त्रिवि अन्तर्राष्ट्रिय क्रिकेट रङ्गशालामा विराटनगर किंग्स र चितवन राइनोज आमनेसामने हुँदैछन्।
विराटनगरले टस जितेर पहिले बलिङ गर्ने निर्णय गरेको छ।

सन्दीप लामिछानेको कप्तानीमा खेलेको विराटनगर यसअघि लगातार तीन खेलमा शानदार जित निकाल्दै तालिकाको दोस्रो स्थानमा उक्लिएको छ। अपराजित यात्रामा रहेको टोली आज पनि चौथो जितका साथ प्ले अफमा दाबेदारी बलियो बनाउन चाहन्छ।

उता, कुशल मल्लको नेतृत्वमा रहेको चितवनले दुई खेलबाट दुई अंक हासिल गर्दै तालिकाको चौथो स्थान ओगटेको छ। एक जित र एक हार व्यहोरेको चितवन अहिले विराटनगरको अपराजित दौड रोक्दै प्रतियोगितामा आफ्नो लय फिर्ता ल्याउने लक्ष्यमा छ।

आजको भिडन्तलाई दुवै टोलीका समर्थकले ‘महत्त्वपूर्ण मोड’का रूपमा हेरेका छन्, किनकि यसले तालिकामा ठूलो प्रभाव पार्नेछ।