Category: स्वास्थ्य-जीवनशैली

काठमाडौँ ,काठमाडौँ महानगरपालिकाले सामाजिक सुरक्षा भत्ता प्राप्त गर्ने ज्येष्ठ नागरिक, एकल महिला, वेवारिसे तथा हिंसापीडित व्यक्ति, अपाङ्गता भएका व्यक्ति र लैङ्गिक हिंसामा परेकालाई निःशुल्क स्वास्थ्योपचार उपलब्ध गराउन छत्रपाटी निःशुल्क चिकित्सालयसँग सम्झौता गरेको छ।

आज उपप्रमुख सुनिता डंगोल र प्रमुख प्रशासकीय अधिकृत सरोज गुरागाईँको रोहबरमा सामाजिक विकास विभागकी प्रमुख समीक्षा निरौला र अस्पतालका अध्यक्ष डा. मनोजमान श्रेष्ठले सम्झौतापत्रमा हस्ताक्षर गरेका छन्।

सम्झौता पछि संक्षिप्त प्रतिक्रिया दिँदै उपप्रमुख डंगोलले पारिवारिक समस्याका कारण उपचारमा जान नपाएका नागरिकले “महानगरपालिका पनि मेरो साथमा छ” भन्ने विश्वास गर्न थालेको उल्लेख गरेकी छन्।
प्रमुख प्रशासकीय अधिकृत गुरागाईँले सेवा आवश्यक पर्ने व्यक्तिले सजिलै उपचार पाओस् र दुरुपयोग रोकियोस् भनेर अस्पताललाई प्रभावकारी प्रणाली बनाउन आग्रह गरेका छन्।

अस्पतालका अध्यक्ष डा. श्रेष्ठले स्वास्थ्योपचारलाई बेवास्ता गर्दै आएका पाका नागरिक उपचारमा आउने, समुदायले उपचारसम्बन्धी जानकारी खोज्ने जस्ता सकारात्मक परिवर्तन महानगरको सहकार्यकै प्रभाव भएको बताएका छन्।

सम्झौताअनुसार काठमाडौँ महानगरपालिकाका कर्मचारी र जनप्रतिनिधिलाई पनि उपचार सेवा उपलब्ध हुनेछ। महिला कर्मचारी तथा जनप्रतिनिधिलाई म्यामोग्राम सेवा प्रदान गरिनेछ।
लैङ्गिक हिंसामा परेका व्यक्ति, वेवारिसे, एकल महिला, अपाङ्गता भएका व्यक्ति तथा सिटी स्क्यान गर्नुपर्ने कर्मचारीका लागि सामाजिक विकास विभागको शिफारिस आवश्यक हुनेछ। यसरी हुने उपचार खर्च महानगरपालिकाले व्यहोर्नेछ।

महानगरपालिकाले उपचार सहकार्यका लागि १ करोड ५० लाख रुपैयाँ विनियोजन गरेको छ। अस्पतालले ३० प्रतिशत थप योगदान दिँदै कुल १ करोड ८० लाख रुपैयाँ बराबरको सेवा प्रदान गर्नेछ।
सम्झौता चालु आर्थिक वर्षका लागि लागू हुने छ।

सेवा लिन कर्मचारी र जनप्रतिनिधिले परिचयपत्र, ज्येष्ठ नागरिकले सामाजिक सुरक्षा भत्ता कार्ड, साथै राष्ट्रिय परिचयपत्र वा नागरिकता अनिवार्य रूपमा बुझाउनुपर्नेछ।

काठमाडौं । स्वास्थ्य तथा जनसंख्यामन्त्री डा. सुधा गौतमले जथाभावी औषधिको सेवन नगर्न आग्रह गरेकी छिन् । विश्व प्रतिजैविक प्रतिरोध अर्थात् एन्टिमाइक्रोबियल रेसिस्टेन्स सचेतना सप्ताहको अवसरमा मंगलबार भिडियो सन्देश जारी गर्दै उनले अनावश्यक जथाभावी औषधि, एन्टिबायोटिक औषधि र एन्टिमाइक्रोबियल औषधि सेवन नगर्न आग्रह गरेकी हुन् ।

एन्टिबायोटिक र अन्य एन्टिमाइक्रोबियल्स औषधिको जथाभावी प्रयोगले एन्टिबायोटिक रेसिस्टेन्स भन्ने अवस्था सिर्जना हुने उल्लेख गर्दै उनले चिकित्सकले लेखेको औषधि पूर्ण डोजमा र आवश्यक मात्रामा मात्रै खान आग्रह गरेकी छिन् । मन्त्री डा. गौतमले उपचारका क्रममा सामान्य औषधिले नछोएर एन्टिबायोटिक र अन्य एन्टिमाइक्रोबियल्स औषधिको प्रयोगले अलि हाम्रो बिमारी नै पनि निको नभएर गम्भीर स्वास्थ्यमा असर पर्ने अवस्थासम्म पुर्याउने गरेको बताईन् । ‘हामीलाई सामान्य औषधिले नछोएर, अलि हाम्रो बिमारी नै पनि निको नभएर गम्भीर स्वास्थ्यमा असर पर्ने अवस्थासम्म हामी पुग्न सक्छौँ । त्यसैले हामीले जँचाएर आवश्यक मात्रामा र आवश्यक औषधि मात्रै प्रयोग गर्नुपर्छ,’ उनले भनेकी छन् । जथाभावी एन्टिबायोटिक औषधि किनेर खाने गर्नाले, खाद्य सामग्रीमा मिसाएर खानाले र पशुपन्छीको आहारका रुपमा खुवाउँदा पनि एन्टिबायोटिक रेसिस्टेन्स हुन सक्ने उनको भनाइ छ । सबैको सहभागितामा मुलुकबाट प्रतिजैविक प्रतिरोध (एन्टिमाइक्रोबियल रेसिस्टेन्स) हुने औषधिका रेसिस्टेन्स कम गर्नलाई सक्रिय भूमिका खेल्न उनले आग्रह गरेकी छिन् ।

यस्तै स्वास्थ्य सचिव डा. विकास देवकोटाले विवेकपूर्ण तरिकाले औषधि प्रयोगको गर्नुपर्ने बताए । उनले प्रतिजैविक प्रतिरोध स्वास्थ्य उपचारमा एक जटिल समस्या बन्दै आइरहेकाले यसलाई समयमै सम्बोधन गर्न सकेनौँ भने भोलि स्वास्थ्य प्रणालीले नराम्रो हार क्षति व्यहोर्नुपर्ने हुनसक्ने बताए । उनले एन्टिमाइक्रोबियल रेसिस्टेन्स चुनौतीको सामना गर्न एन्टिमाइक्रोबियल स्टिवार्डसिप अस्पताल स्तरमा प्रभावकारी रूपमा कार्यान्वयन गर्नुपर्नेमा जोड दिए । ‘हामीले स्वास्थ्य संस्थाहरूमा औषधि प्रयोगको निगरानी, डेटा/तथ्यांक अभिलेख र चिकित्सकहरूको क्षमता विकासलाई प्राथमिकता दिएका छौँ,’ उनले भने, ‘एन्टिमाइक्रोबियल स्टिवर्डसिप कार्यक्रम केवल नीति नभई, व्यवहार परिवर्तनको यात्रा हो जसमा स्वास्थ्यकर्मीहरूको सक्रिय सहभागिता अत्यावश्यक छ ।’

मन्त्रालयले औषधिको प्याकेटमा रातो धर्का दिएका औषधि स्वास्थ्यकर्मीको प्रेस्क्रिप्सन विना सेवन गर्न/नगर्न आग्रह गरेको छ । ‘प्रतिजैविक प्रतिरोध रोकथाममा आजैबाट जुटौँ, हाम्रो वर्तमान जोगाऔँ, भविष्य सुरक्षित पारौँ’ नाराका साथ विश्व प्रतिजैविक प्रतिरोध सचेतना सप्ताह मंगलबारदेखी देशव्यापी रुपमा मनाइँदैछ । सप्ताह मङ्सिर ८ गतेसम्म सञ्चालन हुनेछ ।