सुनसरी । निरन्तर वर्षाको कारण सप्तकोशी नदीको बाहाव यो वर्षकै उच्च भएको छ । आज विहान ८ बजे १ लाख ७० हजार ६ सय ४५ क्युसेक प्रतिसेकेण्ड पानीको बाहाव मापन गरिएको कोशी व्यारेज कन्ट्रोलरुमले जनाएको छ ।
पानीको बाहाव बिहिबार साँझदेखि बढेपछि कोशी व्यारेजको ५६ ढोका मध्ये २३ वटा ढोका खोलिएको छ भने खतराको सूचक रातो बत्ति बालिएको छ । चार दिनदेखि भइरहेको लगातारको वर्षा नरोकिएकोले सप्तकोशीको बहाव अझै उच्च हुन सक्ने बताईएको छ ।
यसै विच निरन्तरको वर्षासँगै खसेको पहिरोले चतरा बराहक्षेत्र सडकखण्ड बिहीबारदेखि अवरुद्ध भएको छ । बराहाक्षेत्र जानेबाटो मोटीडाँडा मुनि पहिरो झर्नुका साथै अरु ठाउँमा पनि पहिरो झरेकोले बराहा क्षेत्र चतरा सडक खण्डमा सवारी सञ्चालन हुन नसकेको बराहाक्षेत्रबासी योगेस भण्डारीले बताए ।
वर्षा नरोकिएकाले बाटो खुलाउने कार्य सुरु गर्न नसकिएको जिल्ला प्रहरी कार्यालय सुनसरीका प्रहरी निरिक्षक अर्जुन पोखरेलले बताए । वर्षा रोकिएसँगै बाटो खुलाउने काम थालिने उनले जानकारी दिए ।
