त्तारुढ दल नेकपाले उम्मेदवार तय गर्न नसक्दा नयाँ सभामुख निर्वाचनका लागि संसद् सचिवालयले तयार गरेको कार्यतालिका प्रभावित हुने भएको छ ।
नेकपाले निर्णय गर्न नसक्दा शुक्रवार दिउँसो १ बजेका लागि बोलाइएको प्रतिनिधि सभा बैठक सूचना टाँसेर स्थगित गर्ने सचिवालयको तयारी छ ।
हिउँदे अधिवेशनको पहिलो दिन पुस ४ गते छोटो समयका लागि बसेको प्रतिनिधि सभाको बैठक सभामुख निर्वाचनको गृहकार्यका लागि भन्दै शुक्रवारसम्मका लागि स्थगित भएको थियो ।
सत्तारुढ नेकपाले उम्मेदवार तय गर्न नसक्दा शुक्रवारको बैठक सूचनामार्फत पुस १६ गते बुधवारसम्मका लागि स्थगित गर्ने सचिवालयको आन्तरिक तयारी छ ।
आजको बैठकबाट सभामुख निर्वाचनको कार्यतालिका प्रकाशित गर्नेगरी सचिवालयले निर्वाचनको सम्भावित कार्यतालिका तयार गरेको थियो ।
आइतवार उम्मेदवारी मनोनयनको समय राखेर सोमवारको बैठकबाट सभामुख निर्वाचन गर्नेगरी सचिवालयले तयार गरेको थियो ।
नेकपा संसदीय दलका उपनेता सुवासचन्द्र नेम्वाङले ११ गते बस्ने बैठकले सभामुख निर्वाचनको मिति तोक्ने बताएका थिए ।
नेकपामा रस्साकस्सी
नेकपाका एक प्रभावशाली नेताले पार्टीमा सभामुखको सर्वसम्मत् उम्मेदवार तय हुन नसकेको बताए । प्रधामनन्त्री एवं अध्यक्ष केपी शर्मा ओलीले नेम्वाङलाई सभामुख बनाउनु पर्ने अडान लिएका छन् ।
नेकपाका अर्का अध्यक्ष पुष्पकमल दाहाल प्रचण्डले भने नेता अग्नि सापकोटाको नाम अगाडि सारेका छन् ।
नेकपाभित्रको एउटा समूहले भने उपसभामुख डा. शिवमाया तुम्बाहाम्फेलाई नै सभामुख बनाउन दबाब दिइरहेको छ ।
‘पार्टीभित्र सभामुखको उम्मेदवारबारे सहमति जुट्न नसक्दा संसद् बैठक नै प्रभावित हुने देखियो,’ नेकपाका एक सांसदले भने ।
मंसिर ४ गते नै हिउँदै अधिवेशन शुरू भएको राष्ट्रिय सभाले भने आफ्नो नियमित काम शुरू गरिसकेको छ । सभामुख नहुँदा प्रतिनिधि सभा भने अनिर्णयको बन्दी बनेको छ ।
संसद् सचिवालयमा कार्यरत एक महिलामाथि यौन दुर्व्यवहारको आरोप लागेपछि तत्कालीन सभामुख कृष्णबहादुर महराले राजीनामा दिएका थिए ।
महराको राजीनामापछि असोज १४ गतेयता प्रतिनिधि सभाको सभामुख पद रिक्त छ ।
