प्राकृतिक सौन्दर्यले भरिपूर्ण रोल्पाको जलजला अर्को संरक्षित क्षेत्रका रूपमा थपिने भएको छ । अन्नपूर्ण, मनास्लु र गौरीशंकरपछि राष्ट्रिय प्रकृति संरक्षण कोषले जलजला संरक्षण क्षेत्र घोषणा गर्ने तयारी गरेको हो । जसलाई चार ‘ज’ अर्थात् जल, जनावर, जंगल र जडीबुटीको भण्डारका रूपमा लिने गरिएको छ ।
समुद्री सतहदेखि तीन हजार ६ सय मिटर उचाइमा अवस्थित जलजला प्राकृतिक रूपमा रमणीय त छ नै पर्यटकीय गन्तव्यका रूपमा पनि नयाँ आकर्षण बनेको छ । यसलाई संरक्षण क्षेत्र घोषणा गरी पयटकीय क्षेत्रका रूपमा विकास गर्ने लक्ष्य बनाएको जलजला संरक्षण क्षेत्र घोषणा कार्यक्रमका अभियन्ता जीवन रोकामगरले बताए । ‘जलजलालाई संरक्षण क्षेत्रका घोषणा गरी जल, जनावर, जंगल र जडीबुटीको संरक्षण गरी पर्यटकीय क्षेत्रमा विकास गर्ने योजना बनाएका छौँ,’ रोकामगरले भने ।
वन तथा वातावरण मन्त्रालयले जलजला संरक्षण क्षेत्र घोषणा गर्न यज्ञनाथ दाहालको संयोजकत्वमा सम्भाव्यता अध्ययन टोली गठन गरेको छ । टोलीले प्रतिवेदन बुझाएपछि संरक्षित क्षेत्र घोषणा गरिने मन्त्रालयका प्रवक्ता सिन्धुप्रसाद ढुंगानाले बताए । ‘सम्भाव्यता अध्ययन टोलीले जलजलाको अध्ययन गरिरहेको छ । प्रतिवेदन बुझाएपछि मात्र घोषणा हुने/नहुने टुंगो लाग्छ,’ ढुंगानाले भने । संरक्षण क्षेत्र हुन लायक देखिए तत्काल घोषणा हुने उनको भनाइ छ ।
